ദുർഗാഷ്ടമി ആഘോഷത്തിൽ താരമായി ആരാധ്യ

കുഞ്ഞിക്കണ്ണുകളിൽ കൗതുകം നിറച്ച് വിദ്യാദേവതയുടെ അനുഗ്രഹം തേടാൻ കുടുംബത്തിനൊപ്പം ആരാധ്യയെത്തിയ ചിത്രം ഇൻസ്റ്റഗ്രാമിൽ പ്രചരിക്കുമ്പോൾ എല്ലാകണ്ണുകളും ഉടക്കുന്നത് ആരാധ്യയുടെ കുസൃതി നിറഞ്ഞ മുഖത്താണ്.

പൈതൃകത്തെയും പാരമ്പര്യത്തെയും കാത്തുസൂക്ഷിക്കാനിഷ്ടപ്പെടുന്ന ഐശ്വര്യ ഓരോ ആഘോഷങ്ങളിലും കുടുംബത്തോടൊപ്പമുണ്ടായിരിക്കാൻ എപ്പോഴും ശ്രദ്ധിക്കാറുണ്ട്. ബന്ധങ്ങളുടെ ഊഷ്മളതയും പരസ്പരമുള്ള സ്നേഹവും ആത്മാർത്ഥതയും അറിഞ്ഞുവേണം ആരാധ്യ വളരേണ്ടതെന്ന നിർബന്ധ ബുദ്ധി ഐശ്യര്യ എന്ന അമ്മയ്ക്കുള്ളതുകൊണ്ടാവണം കുടുംബസമേതമുള്ള ഏതു പൊതുപരിപാടികൾക്കും മകളെയും ഒപ്പം കൂട്ടാൻ ആ അമ്മ ശ്രദ്ധിക്കുന്നത്.

ദൈവം തന്ന മാലാഖക്കുഞ്ഞെന്നാണ് ആരാധ്യയെ അടുത്തിടെ ഒരു അഭിമുഖത്തിൽ ഐശ്വര്യ വിശേഷിപ്പിച്ചത്. തൻെറയുള്ളിലെ കുട്ടിയെ എന്നും ഊർജ്ജ്വസ്വലയായി നിർത്താൻ സഹായിക്കുന്നത് ആരാധ്യയുടെ സാമീപ്യമാണെന്നും ഐശ്വര്യ പറഞ്ഞിരുന്നു. ആരാധ്യയെ മകളായി ലഭിച്ചതിൽ താൻ ദൈവത്തോടു നന്ദി പറയുന്നുവെന്നും തൻെറ ജീവിതത്തിലെ ഏറ്റവും വലിയ അനുഗ്രഹമാണ് ആരാധ്യയെന്നുമാണ് ഐശ്വര്യ എന്ന സന്തോഷവതിയായ അമ്മ പറഞ്ഞത്.

വെള്ളനിറത്തിലുള്ള വസ്ത്രങ്ങൾ ധരിച്ചാണ് ബച്ചൻ കുടുംബം ദുർഗാഷ്ടമി പൂജയ്ക്ക് എത്തിയത്. ശുഭ്രവസ്ത്രം ധരിച്ച് തേജസോടെയെത്തിയ കുടുംബത്തിൽ പക്ഷെ ഏറ്റവും തിളങ്ങി നിന്നത് പ്ലെയിൻ വൈറ്റ് ചിക്കൻകുർത്തി ധരിച്ചെത്തിയ ആരാധ്യ തന്നെയാണ്.